’قومي سگهه‘ ۽ پرڏيهي پاليسيءَ ۾ ڪتب ايندڙ اصطلاح ، جيڪو بين الاقوامي برادريءَ ۾ ڪنهن به قوم جو مرتبو ۽ اثر قائم ڪرڻ لاء ڪم ايندو آهي . ’عالمي عام راءِ‘ ڪنهن به ملڪ جي اختيار ڪيل روش يا پاليسين بابت اُهو تاثر آهي ، جيڪو دنيا جي عوام ۽ ادارن ۾ جُڙي ٿو ۽ لاڳاپيل ملڪ جي ساک قائم ڪرڻ ۾ مددگار ثابت ٿئي ٿو. اهڙو تاثر عالمي سطح تي طئي ڪيل انهن معيارن ، اصولن ۽ قاعدن موجب جُڙي ٿو ، جيڪي وڏي ڳڻ ڳوت کان پوءِعالمي ادارن ، ميڊيا ۽ ٻين قومن طرفان راهنما اصولن طور قبول ڪيا وڃن ٿا ۽ انهن بابت بين الاقوامي سطح تي اتفاق پيدا ٿئي ٿو . مثال: ڪنهن به ملڪ جي سياسي سرشتي ، قيادت جي لاڙن ، اقليتن ڏانهن رويي ، عوامي ڀلائيءَ جي ترجيحن ، پاڙيسري ملڪن سان ناتن ، انساني حقن جي احترام ، صحت تعليم ۽ ٻين شعبن ڏانهن دلچسپيءَ ۽ امن ڀرين پاليسين جي تڪ تور ٿيڻ کان پوءِ ان ملڪ بابت عالمي تاثر جڙڻ لڳي ٿو . جڏهن به ڪا حڪومت مٿي بيان ڪيل رُخن ۾ ناڪاري رويو اختيار ڪري ٿي ۽ اهڙيون پاليسيون ٺاهي ٿي ، جن سان انساني حقن/ مفادن جي لتاڙ جو خدشو پيدا ٿئي ٿو ، ته ’عالمي عام راءِ‘ انهن انساني حقن/ مفادن جي حفاظت لاءِ سڄي دنيا جو عوام ۽ ادارن کي متحرڪ ڪري ٿي. ان کان علاوه عالمي سطح تي امن جي قيام لاءِ بين الاقوامي ادارا جوڙڻ (جهڙوڪ ’قومن جي سڀا‘ ۽ ’گڏيل قومن جي تنظيم‘ ) کان وٺي ’امن مذاڪرات‘ (Peace Talks) ڪرائڻ ، والار پسنديءَ ۽ جنگين جي خلاف ماحول جوڙڻ (جيئن ويٽنام ۽ عراق ۾ آمريڪي مداخلت دوران ڏسڻ ۾ آيو) ، دنيا کي ماحول ، تعليم ۽ صحت سميت درپيش مسئلن تي سُجاڳي پيدا ڪرڻ وارو ڪريڊٽ ’عالمي عام راءِ‘ جوڙيندڙ حلقن کي وڃي ٿو